Туршилтаар
Шийдвэрийн огноо: 2021.11.08-ний өдөр. №184/ШЗ2021/12785
Шийдвэрийн төлөв: Хүчин төгөлдөр
2022.11.14 Процесс Хураангуй- 7
Иргэн Саруул нь “… автомашины үлдэгдэл төлбөр 25.000.000 төгрөг, алданги 12.500.000 төгрөг, нийт 37.500.000 төгрөгийг иргэн Сүхээс гаргуулах” нэхэмжлэлийн шаардлага гаргаж шүүхэд ханджээ.
Хэрэг хянан шийдвэрлэх ажиллагааны явцад нэхэмжлэгч Саруулаас “ … Сүхээд худалдсан автомашины жинхэнэ өмчлөгч нь би биш, “Б” ХХК бөгөөд, тухайн үед миний бие “Б” компаниас олгосон итгэмжлэлийг үндэслэн уг тээврийн хэрэгслийг хариуцагч Сүхээд шилжүүлсэн болно. Иймд нэхэмжлэгчийг “Б” ХХК-иар сольж өгнө үү...” гэжээ.
Иргэний хэрэг шүүхэд хянан шийдвэрлэх тухай хуульд зааснаар, шүүх нэхэмжлэгчийн хүсэлтээр, эсхүл түүний зөвшөөрснөөр нэхэмжлэл гаргах эрхгүй этгээдийг жинхэнэ нэхэмжлэгчээр сольж болохоор заасан байна.
Шүүх нэхэмжлэгч Саруулын хүсэлтийг хүлээн авч хянаад, хүсэлтийг хангаж, түүнийг жинхэнэ нэхэмжлэгч болох “Б” ХХК-иар сольж шийдвэрлэжээ.
Санамж:
Энэ хураангуй нь бүрэн гүйцэд шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно. Мөн зохиомол нэр ашигласан болно.
Хураангуй бэлтгэсэн: Сонгинохайрхан
дүүргийн Иргэний хэргийн анхан шатны
шүүхийн шүүгч Б.Баярмаа
