Туршилтаар
Шийдвэрийн огноо: 2023.05.04-ны өдөр №184/ШЗ2023/08050
Шийдвэрийн төлөв: Хүчин төгөлдөр
2023.04.15 Процесс тойм - 6
Сонгинохайрхан дүүргийн Иргэний хэргийн анхан шатны шүүхийн шүүгчийн 2023 оны 02 дугаар сарын 16-ний өдрийн 184/ШЗ2023/08050 дугаар захирамжаар хэргийн оролцогчийн хүсэлтийн дагуу гэрчээр М-ийг оролцуулахаар шийдвэрлэсэн.
Гэтэл хүсэлтэд дурдсан хаягт гэрч М нь оршин суудаггүй бөгөөд гэрчийн оршин суух хаяг, ажлын газар тодорхой бус байдлаас шалтгаалан шүүхэд дуудан ирүүлэх боломжгүй болсон нь шүүхийн мэдэгдэх хуудас, засаг даргын тодорхойлолтууд, шуудангийн магадалгаа, Шүүх, шүүгчийн аюулгүй байдлыг хангах хэлтсийн хамгаалалтын цагдаагийн илтгэх хуудас болон хэрэгт авагдсан бусад баримтаар тогтоогдсон.
Иргэний хэрэг шүүхэд хянан шийдвэрлэх ажиллагаа нь талуудын зарчимд үндэслэдэг, иргэний хэргийн шүүх мөрдөн шалгах ажиллагаа явуулдаггүй, нотлох баримт цуглуулах, бүрдүүлэх ажиллагаанд шүүх идэвхгүй байр сууринаас ханддаг ба гэрчийг эрэн сурвалжлах, хайж олох эрхийг хуулиар шүүхэд олгоогүй тул гэрчээс мэдүүлэг авахаас татгалзаж шийдвэрлэсэн.
Санамж: Энэ хураангуй нь шүүхийн шийдвэр биш бөгөөд түүнийг орлохгүй, зөвхөн шүүхийн шийдвэрийг олон нийтэд ойлгомжтой байдлаар мэдээлэн хүргэх зорилготой болно.
Хураангуй бэлтгэсэн:
Сонгинохайрхан дүүргийн Иргэний хэргийн
анхан шатны шүүхийн шүүгч Ж.Лхагвасүрэн
